कइसे चिनबे कोन गधा हे अऊ कोन घोड़ा हे...

चुनई आवत हे, अऊ नेता मन ह फेर चिचियावत हे। एक दूसर ल गारी देवईया मन ह फेर एक होवत हे। सत्ता पाय बर नवा नवा उदीम करत हे। भाजपा ह साम्प्रादियक कहने वाला रामविलास पासवान ह ओखर गोद म बइठत हे त मुख्यमंत्री रमन सिंह ल पानी पी पी के गारी देवईया दीपक साहू ह स्वाभिमान मंच ल भाजपा म मिला दिस। स्वाभिमान मंच ल भाजपा म मिले ले छत्तीसगढ़ म भाजपा के ताकत बाढ़ गे अऊ छत्तीसगढिय़ा नेता मन ह फेर मुंह फार दिन। देश भर म आजकल इही चलत हे। भाजपा ह नरेन्द्र मोदी ल हर हाल म प्रधानमंत्री बनाना चाहत हे अऊ उखर जोरदार तैयारी घलो करत हे तभे त वो दिन राजनाथ ह मुसलमान मन ले माफी घलो मांग लीन। सर्वे कंपनी वाला मन घलो पइसा खा खा के बतावत घुमत हे के ए दारी नरेन्द्र मोदी ह प्रधानमंत्री बनने वाला हे। तभे त वो दिन बैसाखु ह घलो नमो नमो जपत रीहिस। कभु मंदिर देवाला के नाम म गुसियाने वाला बैसाखू के मुंह ले नमो नमो सुन के जम्मो झन चकरा गे। पूछ पारिन कइसे बैसाखू कभी विधानसभा चुनाव ल होय दु महिना घलो नहीं बीते हे। ते ह त भाजपा ल पानी पी पी के गारी देवत रेहेस अऊ तोरे सेती भाजपा ह हारीस घलो हे फेर अचानक का होगे के नमो नमो जपत हस त बैसाखू ह हांस हांस के बतावत हे के ओखर मंच ह भाजपा म शामिल होगे हावय अऊ अब ए दारी भाजपा ल जीताना हे।
निहाली ह कतका नहीं केहे रीहिस के बैसाखू के गोठ म झन जावव एखर कोनो ठिकाना नहीं हे। पल म तोला पल म मासा वाला हे। हर चुनाव म नवा नवा पार्टी धर के आ जाथे अऊ सबला बरगलावत रथे।
छत्तीसगढ़ म त दु ए ठन पार्टी के जोर रथे। विधानसभा चुनाव म कतका हो हल्ला नहीं मचे रीहिस फेर का होईस। सरकार त भाजपाच के बनीस। अच्छा-अच्छा तुर्रमखान मन ह निपट गे।
अब लोकसभा के चुनई होवईया हे। ए दारी आम आदमी पार्टी ह हल्ला मचावत हावय। नवा नवा पार्टी के नवा नवा नारा सुन के कतकोन झन झपावत हावय। दिल्ली म आम आदमी पार्टी के सरकार का बनीस बिसहत ल लागथे के इहों ओखरे सरकार बन ही। वो दिन ले काम बुता ल छोड़ के भिड़ गे हावय। वइसे बिसहत ह त दस साल पहिली ले काहत रीहिस के ए भाजपा-कांग्रेस ह नाम भर के अलग पार्टी हे। बिसहत असन कतकोन झन आम आदमी पार्टी म चल दे हावय। फेर बेईमान मन घलो आम आदमी पार्टी म दिखत हावय। अब कोनों ल समझ म नई आवत हे के कोन गधा हे अऊ कोन घोड़ा हे।